|
EXO
KITAABKII LABAAD EE MUUSE EE LA YIDHAAHDO
Si aad u hesho cutubka aad rabtid, fadlan riix
lambarka liiska:
1
Reer Binu Israa'iil Oo La Cadaadiyey
1 Haddaba waa kuwan magacyadii wiilashii Israa'iil, oo Masar
yimid; nin walba iyo reerkiisiiba waxay la yimaadeen Yacquub.
2 Ruubeen, Simecoon, Laawi iyo Yahuudah, 3 Isaakaar, Sebulun,
iyo Benyaamiin, 4 Daan iyo Naftaali, iyo Gaad iyo Aasheer.
5 Oo dadkii ka soo go'ay xanjaadkii Yacquub oo dhammu waxay
ahaayeen toddobaatan qof; Yuusufna Masar buu markii hore joogay.
6 Yuusufna, iyo walaalihiis, iyo farcankaas oo dhanba way wada dhinteen.
7 Oo reer binu Israa'iilna waa bateen, oo aad bay u kordheen,
wayna tarmeen, oo aad iyo aad u xoogaysteen; dhulkiina way buuxiyeen.
8 Haddaba Masar waxaa ka kacay boqor cusub oo aan Yuusuf
aqoonin. 9 Markaasuu wuxuu dadkiisii ku yidhi, Bal eega,
dadkii reer binu Israa'iil waa inaga badan yihiin, wayna inaga xoog weyn yihiin.
10 Kaalaya, aynu si caqli ah ula macaamiloonnee; waaba intaasoo
ay tarmaan, oo ay markuu dagaal dhaco cadaawayaasheenna inoogu darmadaan, oo intay
inala diriraan ay dalka ka baxaane. 11 Haddaba sidaas daraaddeed
ayay niman madax uga dhigeen si ay culaabtooda ugu dhibaan, oo waxay Fircoon u dhiseen
magaalooyin wax lagu kaydiyo oo la yidhaahdo Fitom iyo Racmeses.
12 Laakiinse in kastoo ay aad u dhibeen, haddana aad bay u sii tarmeen,
oo aad bay u faafeen. Oo reer binu Israa'iil aawadood ayay la murugaysnaayeen.
13 Oo Masriyiintiina waxay reer binu Israa'iil ku qasbeen inay qaxar
ku adeegaan, 14 oo waxay naftoodii ku dhibeen hawl aad u
adag, oo ahayd dhoobo la qaso, iyo leben, iyo hawl kasta oo beeraha laga qabto,
oo hawl kastoo ay ku qasbeen inay qabtaanba way ku qaxri jireen.
15 Markaasaa boqorkii Masar wuxuu la hadlay umulisooyinkii
Cibraaniyadaha ahaa, oo middood magaceeda Shifraah la odhan jiray, tan kale magaceedana
Fuwah la odhan jiray, 16 oo wuxuu ku yidhi, Markii aad umulinaysaan
naagaha Cibraaniyadaha, oo aad aragtaan iyagoo gambarka umusha fadhiya, haddii uu
wiil yahay, waa inaad dishaan, haddayse gabadh tahay, ha iska noolaato.
17 Laakiinse umulisooyinkii Ilaah bay ka cabsadeen, mana ay samayn
wixii boqorkii Masar ku amray, ee way badbaadiyeen carruurtii labka ahayd.
18 Markaasaa boqorkii Masar u yeedhay umulisooyinkii, oo wuxuu ku
yidhi, Maxaad waxan u samayseen, oo aad u badbaadiseen carruurtii labka ahayd?
19 Markaasaa umulisooyinkii waxay Fircoon ku yidhaahdeen, Maxaa
yeelay, naagaha Cibraaniyaduhu la mid ma aha naagaha Masriga, oo waa ka dhaqso badan
yihiin, oo intii aan umulisooyinku u iman bay umulaan. 20
Haddaba Ilaah si wanaagsan buu u sameeyey umulisooyinkii, dadkiina waa tarmay, oo
aad bay u xoogaysteen. 21 Oo waxay noqotay, in Ilaah umulisooyinkii
reero u yeelay, maxaa yeelay, Ilaah bay ka cabsadeen. 22
Markaasaa Fircoon wuxuu dadkiisii ku amray, oo ku yidhi, Wiil kasta oo dhasha waa
inaad webiga ku tuurtaan, laakiinse gabadh kasta waa inaad badbaadisaan.
^ Dib u celi bilawga ^
2
Dhalashadii Muuse
1 Markaasaa waxaa tegey nin reer Laawi ah, oo wuxuu guursaday
gabadh reer Laawi iyana ah. 2 Markaasay naagtii uuraysatay
oo waxay dhashay wiil; oo markay aragtay inuu ilmo wanaagsan yahay, ayay qarisay
in saddex bilood ah. 3 Oo markay in dambe qarin kari weyday,
ayay waxay soo qaadday abxad caws duur ah, oo intay dhoobo iyo daamur ku malaastay
ayay wiilkii ku ridday, oo waxay dhex gelisay duur webiga qarkiisa ka baxay.
4 Walaashiisna waxay taagnayd meel ka fog, inay ogaato waxa isaga
lagu samayn doono. 5 Markaasaa gabadhii Fircoon webiga timid
inay ku maydhato. Gabdhihii addoommada u ahaana waxay socdeen webigii dhinaciisa.
Markaasay iyadu waxay aragtay abxadda duurka ku dhex jirta, oo waxay u diratay gabadhii
addoonta u ahayd inay u keento. 6 Markaasay furtay, oo waxay
aragtay wiilkii; oo bal eeg, yarkii waa ooyay. Kolkaasay u naxariisatay, oo waxay
tidhi, Kanu waa carruurtii Cibraaniyada midkood. 7 Markaasaa
walaashiis waxay gabadhii Fircoon ku tidhi, Ma kuugu yeedhaa naagaha Cibraaniyadaha
middood inay kuu nuujiso ilmaha? 8 Gabadhii Fircoonna waxay
ku tidhi iyadii, Haah, tag. Gabadhiina way tagtay oo waxay u yeedhay yarkii hooyadiis.
9 Markaasaa gabadhii Fircoon waxay ku tidhi iyadii, Tag,
oo ilmahan qaad oo ii nuuji, oo anna waxaan ku siin doonaa mushahaaradaada. Markaasay
naagtii yarkii qaadday oo nuujisay. 10 Yarkiina waa koray,
markaasay u keentay gabadhii Fircoon, oo wuxuu noqday wiilkeedii. Oo waxay magiciisii
u bixisay Muuse, oo waxay tidhi, Maxaa yeelay, anaa biyihii ka soo bixiyey.
Muuse Oo U Cararay Midyaan
11 Oo waayahaas, markii Muuse weynaaday, waxay noqotay inuu
walaalihiis u soo baxay, oo uu fiiriyey culaabta saaran. Markaasuu wuxuu arkay mid
Masri ah oo dilaya mid Cibraani ah oo walaalihiis ka mid ah.
12 Markaasuu iska fiiriyey xagga iyo xagga, oo markuu arkay inaan ciduna joogin
ayuu Masrigii kaw kaga siiyey, oo ciidda ku qariyey. 13 Markaasuu
haddana maalintii labaad soo baxay, oo wuxuu arkay laba nin oo Cibraaniyo ah oo
isla diriraya; oo kii gardarnaa buu wuxuu ku yidhi, War maxaad u dilaysaa wadaygaa?
14 Markaasuu wuxuu yidhi, Bal yaa amiir iyo xaakin nooga
kaa dhigay? Ma waxaad doonaysaa inaad ii disho sidaad u dishay Masriga? Markaasaa
Muuse cabsaday, oo wuxuu isyidhi, Hubaal wixii waa la ogaaday.
15 Haddaba markii Fircoon waxaas maqlay, ayuu wuxuu doondoonay inuu
Muuse nafta ka qaado. Laakiinse Muuse waa ka cararay Fircoon hortiisii, oo wuxuu
degay dalka Midyaan, oo ceel buu ag fadhiistay. 16 Haddaba
wadaadkii Midyaan wuxuu lahaa toddoba gabdhood. Intay ceelkii yimaadeen ayay dhaamiyeen
oo berkedihii biyo ka buuxiyeen inay waraabiyaan idihii aabbahood.
17 Markaasaa adhijirro yimaadeen oo ka eryeen, laakiinse Muuse intuu
istaagay, ayuu caawiyey iyagii, oo idahoodii u waraabiyey.
18 Oo markay u yimaadeen Recuu'eel oo aabbahood ah ayuu wuxuu ku yidhi, Waa sidee,
maanta waad soo dhaqsateene? 19 Markaasay waxay yidhaahdeen,
Midkoo Masri ah ayaa naga samatabbixiyey gacantii adhijirrada, oo weliba biyuu noo
dhaamiyey oo idaha isagaa noo waraabiyey. 20 Markaasuu wuxuu
gabdhihiisii ku yidhi, Isagii meeyey? De maxaad ninkii uga soo kacdeen? U yeedha,
kibis ha cunee. 21 Muusena raalli buu ka ahaa inuu ninkaas
la joogo, oo isagu wuxuu Muuse siiyey gabadhiisii Siforaah.
22 Oo waxay u dhashay wiil, markaasuu magiciisii wuxuu u bixiyey
Gershoom, waayo, wuxuu yidhi, Qariib baan ku ahaa dal qalaad.
23 Oo waxay noqotay in waayahaas badan dabadeed uu boqorkii
Masar iska dhintay, reer binu Israa'iilna addoonnimada aawadeed ayay ula taaheen,
oo way ooyeen, oo oohintoodiina waxay gaadhay Ilaah addoonnimada aawadeed.
24 Ilaahna waa maqlay cabaadkoodii, markaasaa Ilaah xusuustay axdigiisii
uu la dhigtay Ibraahim, iyo Isxaaq, iyo Yacquub. 25 Markaasaa
Ilaah arkay reer binu Israa'iil, Ilaahna wuu ogaaday xaalkoodii.
^ Dib u celi bilawga ^
3
Muuse Iyo Geedka Ololayey
1 Muuse wuxuu ilaalinayay adhigii soddoggiis Yetroo oo ahaa
wadaadkii Midyaan, oo wuxuu adhigii u soo kexeeyey meeshii cidlada ahayd shishadeeda,
markaasuu wuxuu yimid buurtii Ilaah oo ahayd Xoreeb. 2 Markaasaa
malaa'igtii Rabbigu waxay uga muuqatay dab ololaya oo ka baxaya geed dhexdiis, kolkaasuu
fiiriyey oo wuxuu arkay geedkii oo ololaya oo dabku gubayo, geedkuna ma basayn.
3 Markaasaa Muuse wuxuu yidhi, Anigu waan ku leexan doonaa,
waanan arki doonaa muuqashadan weyn, iyo waxa geedku u guban waayay.
4 Oo markuu Rabbigu arkay inuu ku soo leexday inuu arko ayaa Ilaah
uga yeedhay geedka dhexdiisii, oo wuxuu ku yidhi, Muusow, Muusow. Markaasuu yidhi,
Waa i kan. 5 Markaasuu wuxuu ku yidhi, Halkan ha u soo dhowaan,
kabahana iska siib, waayo, meesha aad taagan tahay waa dhul quduus ah.
6 Oo weliba wuxuu kaloo ku yidhi, Anigu waxaan ahay Ilaahii aabbahaa
oo ah Ilaahii Ibraahim, iyo Ilaahii Isxaaq, iyo Ilaahii Yacquub. Markaasaa Muuse
wejigiisii qariyey, waayo, wuxuu ka cabsaday inuu Ilaah eego.
7 Rabbiguna wuxuu ku yidhi, Hubaal waxaan arkay dhibaatada dadkayga ku haysata Masar,
oo waan maqlay oohintii ay ooyeen kuwa hawsha ku qaxraya aawadood, waayo, anigu
waan ogahay caloolxumadooda; 8 oo waxaan u imid inaan ka
samatabbixiyo gacanta Masriyiinta, iyo inaan ka soo bixiyo dhulkaas, oo keeno dhul
wanaagsan oo ballaadhan, oo ah dal caano iyo malab la barwaaqaysan; waana meesha
ay deggan yihiin reer Kancaan, iyo reer Xeed, iyo reer Amor, iyo reer Feris, iyo
reer Xiwi, iyo reer Yebuus. 9 Oo haatan bal eeg, waxaa i
hor timid oohintii reer binu Israa'iil, oo weliba waxaan arkay cadaadinta ay Masriyiintu
ku cadaadinayaan iyaga. 10 Haddaba kaalay, oo waxaan kuu
dirayaa Fircoon, inaad dalka Masar ka soo kaxaysid dadkayga reer binu Israa'iil
ah. 11 Markaasaa Muuse wuxuu Ilaah ku yidhi, Bal yaan ahay
anigu, markaan Fircoon u tegayo, oo aan reer binu Israa'iil ka soo bixinayo dalka
Masar? 12 Markaasuu wuxuu ku yidhi, Xaqiiqa anigaa kula jiraya,
oo taasaa calaamo kuu noqonaysa, inaan anigu ku soo diray; markii aad dadka ka soo
bixiso Masar, Ilaah baad buurtan ugu adeegi doontaan.
13 Markaasaa Muuse wuxuu Ilaah ku yidhi, Bal eeg, markii
aan u tago reer binu Israa'iil, oo aan ku idhaahdo iyaga, Ilaahii awowayaashiin
baa ii soo kiin diray, oo iyaga waxay igu odhan doonaan, De magiciisa maxaa la yidhaahdaa?
Haddaba maxaan ku odhan doonaa? 14 Markaasaa Ilaah wuxuu
Muuse ku yidhi, ANIGU WAXAAN AHAY KAAN AHAY; oo weliba wuxuu ku yidhi, Waxaad ku
odhan doontaa reer binu Israa'iil, WAAN AHAY baa ii soo kiin diray.
15 Oo Ilaah weliba wuxuu kaloo Muuse ku yidhi, Waxaad ku tidhaahdaa
reer binu Israa'iil, Rabbiga ah Ilaahii awowayaashiin, oo ah Ilaahii Ibraahim, iyo
Ilaahii Isxaaq, iyo Ilaahii Yacquub ayaa ii soo kiin diray; kanu waa magacayga weligay,
oo laygu xusuusto ka ab ka ab. 16 Bal tag, oo isu soo ururi
waayeellada reer binu Israa'iil, oo waxaad ku tidhaahdaa, Rabbiga ah Ilaahii awowayaashiin,
oo ah Ilaahii Ibraahim, iyo Ilaahii Isxaaq, iyo Ilaahii Yacquub ayaa ii muuqday,
isagoo leh, Hubaal waan idin soo booqday, oo waan arkay waxa laydinku sameeyey Masar
dhexdeeda, 17 oo waxaan idhi, Anigu waan idinka soo wadi
doonaa dhibaatada Masar, oo waxaan idin keeni doonaa dalka reer Kancaan, iyo reer
Xeed, iyo reer Amor, iyo reer Feris, iyo reer Xiwi, iyo reer Yebuus, oo ah dal caano
iyo malab la barwaaqaysan. 18 Oo codkaaga way maqli doonaan,
markaas adiga iyo waayeellada reer binu Israa'iil waa inaad u tagtaan boqorka Masar,
oo waxaad ku tidhaahdaan, Rabbiga ah Ilaaha Cibraaniyada ayaa nala kulmay. Haddaba
waan ku baryaynaaye, Iska kaaya daa aannu meel saddex maalmood loo socdo oo cidla
ah tagnee, inaannu allabari u bixinno Rabbiga ah Ilaahayo.
19 Oo anna waxaan ogahay inaanu boqorka Masar idiin sii daynayn
inaad tagtaan, maya, ee wuxuuna idiinku diidayaa gacan xoog leh.
20 Markaasaan gacantayda soo kala bixin doonaa, oo waxaan Masar ku layn doonaa cajaa'ibyadayda
oo dhan oo aan ku dhex samayn doono iyada, oo markaas dabadeed wuu idin sii dayn
doonaa inaad iska tagtaan. 21 Oo anigu dadkan raalli baan
uga yeeli doonaa Masriyiinta; oo waxay noqon doontaa in markii aad tagtaan aydnaan
faromadhnaan ku tegin, 22 laakiinse naag waluba ha weyddiisato
deriskeeda iyo tan guriga la joogta alaab lacag ah iyo alaab dahab ah, iyo dhar;
waxaadna saari doontaan wiilashiinna iyo gabdhihiinna, oo waxaad dhici doontaan
Masriyiinta.
^ Dib u celi bilawga ^
4
Cajaa'ibyadii La Tusay Muuse
1 Markaasaa Muuse jawaabay oo wuxuu yidhi, Laakiinse, bal
ogow, ima ay rumaysan doonaan, codkaygana ma ay dhegaysan doonaan, waayo, waxay
igu odhan doonaan, Rabbigu kuuma uu muuqanin. 2 Markaasaa
Rabbigu wuxuu ku yidhi, Waa maxay waxaas gacantaada ku jiraa? Oo wuxuu yidhi, Waa
ul. 3 Markaasuu ku yidhi, Bal dhulka ku tuur. Markaasuu dhulka
ku tuuray, oo waxay noqotay abeeso. Kolkaasaa Muuse ka hor cararay.
4 Markaasaa Rabbigu wuxuu Muuse ku yidhi, Bal gacanta soo fidi oo
dabada ku dheg, kolkaasuu gacantii soo fidiyey oo dabada ku dhegay, kolkaasay noqotay
ul gacantiisa ku jirta. 5 Sidaas yeel inay ku rumaystaan
inuu kuu muuqday Rabbiga ah Ilaahii awowayaashood, oo ah Ilaahii Ibraahim, iyo Ilaahii
Isxaaq, iyo Ilaahii Yacquub. 6 Oo Rabbigu wuxuu kaloo ku
sii yidhi isagii, Bal gacanta laabta saar, markaasuu gacanta laabta saaray, oo markii
uu ka qaaday, bal eeg, gacantii baras bay yeelatay oo waxay u caddaatay sida baraf
cad. 7 Markaasuu ku yidhi, Bal gacanta laabta mar kale saar.
Kolkaasuu mar kale gacantii laabta saaray, oo markii uu ka qaaday laabtii, bal eeg,
waxay haddana u rogmatay oo u ekaatay sida jidhkiisii kale.
8 Oo waxay noqon doontaa, hadday kugu rumaysan waayaan oo ay calaamada
hore codkeeda maqli waayaan, de markaas calaamada dambe codkeeday rumaysan doonaan.
9 Oo haddana waxay noqon doontaa, hadday rumaysan waayaan
labadan calaamo, oo weliba ay codkaaga maqli waayaan, de markaas bal waa inaad webiga
biyo ka qaaddid oo aad dhulka engegan ku shubtid, oo biyihii aad webiga ka qaadday,
markay gaadhaan dhulka engegan dhiig bay noqon doonaan. 10
Markaasaa Muuse wuxuu Rabbiga ku yidhi, Rabbiyow, anigu codkar ma ahi, hadda iyo
hore toona, iyo tan iyo markaad ila hadashay anigoo addoonkaaga ah, maxaa yeelay,
anigu hadalka waan shigaa, waanan carrab la'ahay. 11 Markaasaa
Rabbigu wuxuu ku yidhi, Kan dadka afkiisa sameeyey waa ayo? Yaase dadka carrab tira,
ama dhego tira, ama wax tusa, ama indho tira? Sow anigan Rabbiga ah ma aha?
12 Haddaba sidaas daraaddeed tag, oo anigaa afkaaga la jiri doona
oo ku bari doona wixii aad ku hadli lahayd. 13 Isna wuxuu
yidhi, Rabbiyow, Waan ku baryayaaye, dir kaad doonaysid inaad dirtid.
14 Markaasaa Rabbigu u cadhooday Muuse, oo wuxuu ku yidhi, Sow ma
joogo walaalkaa Haaruun oo ah reer Laawi? Waan ogahay inuu isagu si wanaagsan u
hadli karo. Oo bal ogow, wuu u soo socdaa inuu kula kulmo, oo markuu ku arko, qalbigiisuu
ka farxi doonaa. 15 Haddaba waa inaad isaga la hadashaa,
oo aad erayada afkiisa ku riddaa, oo anigu afkaagaan la jiri doonaa, iyo afkiisaba,
oo waxaan idin barayaa wixii aad samayn lahaydeen. 16 Oo
isagu wuxuu kuu noqon doonaa ninka dadka kuula hadla, oo waxay noqon doontaa inuu
isagu af kuu noqdo, adna waxaad isaga u noqon doontaa Ilaah oo kale.
17 Haddaba waa inaad gacanta ku qaadatid ushan aad cajaa'ibyada
ku samayn doontid.
Muuse Oo Ku Noqday Masar
18 Markaasaa Muuse tegey oo wuxuu ku noqday soddoggiis Yetroo,
oo wuxuu ku yidhi, Waan ku baryayaaye, Bal i sii daa aan tagee, oo ku noqdo walaalahayga
Masar jooga, oo aan soo arkee bal inay nool yihiin iyo in kale. Markaasaa Yetroo
wuxuu Muuse ku yidhi, Nabad ku tag. 19 Markaasaa Rabbigu
wuxuu ku yidhi Muuse, isagoo Midyaan jooga, Tag, oo Masar ku noqo, waayo, dadkii
doondoonayay inay nafta kaa qaadaan way wada dhinteen. 20
Markaasaa Muuse wuxuu watay naagtiisii iyo wiilashiisii, oo wuxuu saartay dameer,
wuxuuna ku noqday dalkii Masar. Markaasaa Muuse ushii Ilaah gacanta ku qaatay.
21 Rabbiguna wuxuu Muuse ku yidhi, Markii aad Masar ku noqotid,
cajaa'ibyadii aan gacantaada ku riday oo dhan Fircoon hortiisa ku samee, laakiinse
anigu qalbigiisaan qallafin doonaa, oo dadka ma uu sii dayn doono inay tagaan.
22 Oo waxaad Fircoon ku tidhaahdaa, Rabbigu wuxuu yidhi, Israa'iil
waa wiilkayga curadka ah, 23 oo waxaan adiga kugu idhi, Wiilkayga
sii daa, ha tagee oo ha ii adeegee. Adiguse waad u diiday inuu tago. Bal hadda ogow,
waxaan dili doonaa wiilkaaga curadka ah. 24 Intay jidka sii
socdeen meel bay ku habeen dhexeen, Rabbi baana ugu yimid, oo wuxuu damcay inuu
dilo isaga. 25 Markaasaa Siforaah waxay qaadatay dhagax af
leh, oo wiilkeedii buuryadiisii bay ku gooysay, oo waxay ku ag tuurtay cagihiisa
oo tidhi, Hubaal waxaad ii tahay arooskii dhiigga. 26 Markaasuu
iska daayay isagii. Kolkaasay tidhi, Waxaad ii tahay arooskii dhiigga gudniinta
aawadeed. 27 Markaasaa Rabbigu wuxuu Haaruun ku yidhi, Tag
inaad Muuse kaga hor tagtid cidlada dhexdeeda. Markaasuu tegey, oo wuxuu kaga hor
tegey buurta Ilaah, kolkaasuu dhunkaday. 28 Kolkaasaa Muuse
wuxuu Haaruun u sheegay erayadii Rabbigu u soo faray oo dhan, iyo calaamooyinkii
uu ku amray oo dhan. 29 Markaasaa Muuse iyo Haaruun tageen
oo waxay isu soo ururiyeen waayeelladii reer binu Israa'iil oo dhan.
30 Markaasaa Haaruun kula hadlay erayadii Rabbigu Muuse u soo faray
oo dhan, calaamooyinkiina dadka hortiisuu ku sameeyey. 31
Dadkiina way rumaysteen, oo markay maqleen inuu Rabbigu soo booqday reer binu Israa'iil
iyo inuu arkay dhibaatadooda ayay madaxa hoos u foorariyeen oo caabudeen.
^ Dib u celi bilawga ^
5
Cadaadin Oo Sii Korodhay
1 Oo dabadeedna Muuse iyo Haaruun waxay u tageen Fircoon,
oo waxay ku yidhaahdeen, Rabbiga ah Ilaaha reer binu Israa'iil wuxuu leeyahay, Sii
daa dadkaygu ha tageene, inay cidlada iigu ciidaan. 2 Markaasaa
Fircoon wuxuu yidhi, Waa ayo Rabbiga ay waajibka igu tahay inaan codkiisa maqlo
oo aan reer binu Israa'iil sii daayo? Anigu garan maayo Rabbiga, oo weliba sii dayn
maayo reer binu Israa'iil inay tagaan. 3 Markaasay waxay
ku yidhaahdeen, Ilaahii Cibraaniyada ayaa nala kulmay, haddaba waannu ku baryaynaaye,
Na sii daa, aannu tagnee meel cidla ah oo saddex maalmood loo socdo oo aan allabari
ugu bixinnee Rabbiga ah Ilaahayaga inuusan belaayo ama seef nagu soo dejin.
4 Markaasaa boqorkii Masar wuxuu ku yidhi iyagii, Muuse iyo Haaruunow,
maxaad dadka uga joojinaysaan shuqulladooda? Orda oo hawlihiinna culculus qabsada.
5 Kolkaasaa Fircoon wuxuu yidhi, Bal eega, haatan dadka dalku
waa badan yihiin, oo idinku waad ka nasiseen hawlahoodii cuscuslaa. 6 Markaasaa Fircoon wuxuu isla maalintaas ku amray kuwii dadka hawsha
ku cadaadin jiray iyo saraakiishoodii, isagoo leh, 7 Hadda
dabadeed waa inaydnaan dadka siin caws ay leben ka sameeyaan sidii loo siin jiray,
laakiinse iyagu ha tageen oo caws ha soo gurteen. 8 Oo lebenkii
ay markii hore samayn jireen tiradiisii oo kale waa inaad hadda ka dib ku qasabtaan
inay sameeyaan, oo waa inaydnaan waxba ka dhimin, waayo, waa caajisiin oo sidaas
daraaddeed waxay u qaylinayaan, iyagoo leh, Na sii daa aannu tagnee oo aan Ilaahayaga
allabari u bixinnee. 9 Haddaba nimanka ha lagu qasbo hawl
ka culus intii hore inay ku hawshoodaan, oo yaanay hadal been ah u jeedin.
10 Markaasay kuwii hawsha dadka ku cadaadin jiray iyo saraakiishoodiiba
dibadda u bexeen, oo waxay la hadleen dadkii, oo ku yidhaahdeen, Waxaa Fircoon idin
leeyahay, Caws idin siin maayo. 11 Idinku taga oo caws ka
doonta meeshii aad ka heli kartaan, laakiin hawshiinna waxba laydinka dhimi maayo
innaba. 12 Sidaa daraaddeed ayaa dadku ku kala firdhay dalkii
Masar oo dhan inay jirrido jajab ah soo ururiyaan meeshii cawska laga siin jiray.
13 Oo kuwii dadka hawsha ku cadaadin jirayna way daddajiyeen,
oo waxay ku yidhaahdeen, Dhammeeya shuqulladiinna, iyo hawshiinna intii aad maalin
walba samayn jirteen, sidii markii cawsku jiri jiray oo kale.
14 Oo saraakiishii reer binu Israa'iil, oo Fircoon kuwiisa dadka
hawsha ku cadaadiyaa ay dadka madaxda uga dhigeen, waa la garaacay, oo waxaa lagu
yidhi, War maxaad shalay iyo maantaba hawshiinna u dhammayn weydeen oo aad lebenkii
ugu samayn weydeen sidii hore? 15 Markaasay saraakiishii
reer binu Israa'iil waxay u tageen oo u cataabeen Fircoon, waxayna ku yidhaahdeen,
War maxaad addoommadaada sidan ugula macaamilootaa? 16 Addoommadaada
caws lama siiyo, oo waxay nagu yidhaahdaan, Leben sameeya. Oo bal eeg, addoommadaadii
waa la garaacaa, laakiinse gardarrada waxaa iska leh dadkaaga.
17 Laakiinse wuxuu ku yidhi iyagii, Caajisiin baad tihiin, caajisiin
baad tihiin, oo sidaas daraaddeed baad u leedihiin, Aannu tagno oo aan Rabbiga allabari
u bixinno. 18 Haddaba taga oo shaqeeya, waayo, caws laydin
siin maayo, oo weliba waa inaad keentaan tiradii lebenkii oo kale.
19 Oo saraakiishii reer binu Israa'iil waxay arkeen in xaalkoodii
xun yahay, markii lagu yidhi, Waa inaydnaan waxba dhimin lebenkii aad maalin walba
samayn jirteen. 20 Oo markay Fircoon ka soo bexeen waxay
ka hor yimaadeen Muuse iyo Haaruun oo jidka taagtaagan, 21
oo waxay ku yidhaahdeen, Rabbigu ha idin fiiriyo oo ha idin xukumo, waayo, waxaad
naga dhigteen wax u ura Fircoon iyo addoommadiisii si ay noo nacaan oo ay intay
seefo noo qaataan noo laayaan.
Ilaah Oo Ballanqaaday Samatabbixin
22 Markaasaa Muuse mar kale Rabbiga u jeestay, oo wuxuu ku
yidhi, Rabbiyow, maxaad dadkan si xun ugula macaamilootay? Oo maxaad aniga ii soo
dirtay? 23 Ilaa markii aan u imid Fircoon oo aan magacaaga
kula hadlay isaga, wax xun buu dadkan ku sameeyey, oo adna dadkaaga kama aad samatabbixin
innaba.
^ Dib u celi bilawga ^
6
1 Markaasaa Rabbigu wuxuu Muuse ku yidhi, Haddaba waad arki
doontaa waxaan ku samayn doono Fircoon, waayo, gacan xoog leh buu ku sii dayn doonaa
iyaga, oo gacan xoog leh buu dhulkiisa kaga eryi doonaa.
2 Markaasaa Ilaah wuxuu la hadlay Muuse oo ku yidhi, Anigu
waxaan ahay Rabbiga, 3 oo waxaan ugu muuqday Ibraahim, iyo
Isxaaq, iyo Yacquub, sidii Ilaaha Qaadirka ah, laakiinse magacayga ah RABBI iguma
ay aqoonin. 4 Oo weliba axdigaygii waan la dhigtay iyaga
inaan siiyo dalka reer Kancaan oo ah dalkii geeddinimadooda oo ay qariibka ku ahaayeen.
5 Oo weliba waxaan maqlay cabaadka reer binu Israa'iil oo
Masriyiintu addoonsiga ku sii hayaan, oo axdigaygii baan xusuustay.
6 Haddaba waxaad reer binu Israa'iil ku tidhaahdaa, Anigu waxaan
ahay Rabbiga, oo waan idinka soo bixin doonaa culaabta Masriyiintu idinku hoos hayaan,
waanan idinka xorayn doonaa addoonsigooda, waanan idinku furan doonaa gacan fidsan
iyo xukummo waaweyn, 7 oo waxaan idiin qaadan doonaa dad
ahaan, oo aan idiin noqon doonaa Ilaah, oo waxaad ogaan doontaan inaan anigu ahay
Rabbiga Ilaahiinna ah oo idinka bixinaya culaabtii Masriyiinta.
8 Oo waxaan idin geeyn doonaa dalkii aan ku dhaartay inaan siiyo Ibraahim, iyo Isxaaq,
iyo Yacquub, oo idinkaan dhaxal ahaan idiin siin doonaa. Anigu waxaan ahay Rabbiga.
9 Muusena sidaasuu reer binu Israa'iil ula hadlay, laakiinse
ma ayan maqlin Muuse, caloolxumadooda iyo addoonsiga aan looga tudhayn aawadood.
10 Markaasaa Rabbigu Muuse la hadlay, isagoo leh,
11 Fircoon oo ah boqorka Masar u tag, oo la hadal, si uu u sii daayo
reer binu Israa'iil si ay dalkiisa uga baxaan. 12 Markaasaa
Muuse Rabbiga la hadlay oo wuxuu ku yidhi, Bal eeg, reer binu Israa'iil ima maqline,
de haddaba sidee buu Fircoon ii maqli doonaa, anigoo aan bushimaha ka xalaalaysnayn?
Abtirsiinadii Muuse Iyo Haaruun
13 Markaasaa Rabbigu wuxuu la hadlay Muuse iyo Haaruun, oo
amar buu u soo faray reer binu Israa'iil, iyo boqorkii Masar oo ahaa Fircoon, inay
reer binu Israa'iil ka soo wadaan dalka Masar. 14 Kuwanu
waa madaxdii reerihii awowayaashood, kuwanu waa reer Ruubeen oo ahaa curadkii Israa'iil,
Xanoog, iyo Falluu, iyo Xesroon, iyo Karmii; kuwanu waa qolooyinkii reer Ruubeen.
15 Reer Simecoonna waa kuwan, Yemuu'eel, iyo Yaamiin, iyo
Ohad, iyo Yaakiin, iyo Sohar, iyo Shaa'uul oo ahaa wiilkii ay naag reer Kancaan
ah dhashay. Kuwanu waa qolooyinkii reer Simecoon. 16 Kuwanuna
waa reer Laawi magacyadoodii, iyo sidii farcankoodii kala ahaayeen; Gershoon, iyo
Qohaad, iyo Meraarii. Oo Laawi cimrigiisii wuxuu ahaa boqol iyo toddoba iyo soddon
sannadood. 17 Reer Gershoon, iyo sidii qolooyinkoodu kala
ahaayeenna waa Libnii iyo Shimcii. 18 Reer Qohaadna waa Camraam,
iyo Isehaar, iyo Xebroon, iyo Cusii'eel. Oo Qohaad cimrigiisiina wuxuu ahaa boqol
iyo saddex iyo soddon sannadood. 19 Reer Meraariina waa Maxlii
iyo Mushii. Kuwanu waa qolooyinkii reer Laawi iyo sidii ay farcankoodii kala ahaayeen.
20 Oo Camraam wuxuu guursaday Yookebed oo eeddadiis ahayd,
oo waxay u dhashay Haaruun iyo Muuse. Oo Camraam cimrigiisiina wuxuu ahaa boqol
iyo toddoba iyo soddon sannadood. 21 Reer Isehaarna waa Qorax,
iyo Nefeg, iyo Sikrii. 22 Reer Cusii'eelna waa Miishaa'eel,
iyo Elsaafaan, iyo Sitrii. 23 Haaruunna wuxuu guursaday Eliishebac
ina Cammiinaadaab oo ahayd Naxshoon walaashiis; oo waxay u dhashay Naadaab iyo Abiihuu,
iyo Elecaasaar, iyo Iitaamaar. 24 Reer Qoraxna waa Asiir,
iyo Elqaanaah, iyo Abii'aasaaf. Kuwanu waa qolooyinkii reer Qorax.
25 Markaasaa Elecaasaar oo ahaa ina Haaruun wuxuu guursaday gabdhihii
Fuutii'eel middood, oo waxay u dhashay Fiinexaas. Kuwanu waa madaxdii reer Laawi,
iyo qolooyinkoodii siday kala ahaayeen. 26 Kuwanu waa Haaruun
iyo Muuse kuwii Rabbigu ku yidhi, Reer binu Israa'iil ka soo wada dalka Masar sida
ay dadkooda guutooyinkoodu yihiin. 27 Kuwanuna waa kuwii
la hadlay boqorkii Masar oo Fircoon ahaa, inuu dalka Masar ka bixiyo reer binu Israa'iil.
Iyagu waa Muusahaas iyo Haaruunkaas.
Haaruun Oo U Hadlaya Muuse
28 Maalintii Rabbigu la hadlay Muuse oo dalka Masar jooga,
29 wuxuu Rabbigu ku yidhi Muuse, Anigu waxaan ahay Rabbiga.
Boqorka Masar oo Fircoon ah la hadal oo waxaad u sheegtaa wixii aan kugula hadlo
oo dhan. 30 Markaasaa Muuse wuxuu ku yidhi Rabbiga, Bal eeg,
anigu bushimaha kama xalaalaysni, de haddaba sidee buu Fircoon ii maqlayaa?
^ Dib u celi bilawga ^
7
1 Markaasaa Rabbigu wuxuu Muuse ku yidhi, Bal fiiri, waxaan
Fircoon kaaga dhigay sidii ilaah oo kale, walaalkaa Haaruunna wuxuu ahaan doonaa
nebigaaga. 2 Adigu waa inaad ku hadasho waxa aan kugu amrayo
oo dhan; walaalkaa Haaruunna waa inuu Fircoon la hadlo si uu reer binu Israa'iil
u sii daayo si ay dalkiisa uga baxaan. 3 Oo Fircoon qalbigiisana
waan qallafin doonaa, calaamooyinkayga iyo cajaa'ibyadaydana waan ku badin doonaa
dalka Masar. 4 Laakiin Fircoon kuma maqli doono, markaasaan
gacantayda saari doonaa Masar, oo aan soo bixin doonaa ciidankayga oo ah dadkayga
reer binu Israa'iil, waanan kaga soo saari doonaa xukummo waaweyn dalka Masar.
5 Markaasaa Masriyiintu ogaan doonaan inaan anigu Rabbiga ahay,
markii aan gacantayda Masar ku kor fidiyo, oo aan reer binu Israa'iil ka dhex bixiyo
iyaga. 6 Markaasaa Muuse iyo Haaruun sidaas yeeleen. Sidii
Rabbigu ku amray, ayay yeeleen. 7 Muusena markaas wuxuu jiray
siddeetan sannadood, Haaruunna wuxuu jiray saddex iyo siddeetan sannadood markay
Fircoon la hadleen.
Usha Haaruun Oo Noqotay Abeeso
8 Markaasaa Rabbigu la hadlay Muuse iyo Haaruun, oo wuxuu
ku yidhi, 9 Markii Fircoon idinla hadlo, oo idinku yidhaahdo,
Cajaa'ib i tusa; markaas waxaad Haaruun ku tidhaahdaa, Ushaada qaado, oo Fircoon
hortiisa ku tuur, si ay abeeso u noqoto. 10 Markaasaa Muuse
iyo Haaruun waxay u tageen Fircoon, oo waxay yeeleen sidii Rabbigu ku amray, markaasaa
Haaruun ushiisii ku hor tuuray Fircoon iyo addoommadiisii, oo waxay noqotay abeeso.
11 Fircoonna markaasuu wuxuu u yeedhay raggiisii xigmadda
lahaa iyo saaxiriintiisii, markaasaa falalowyadii Masarna iyana yeeleen sidii si
le'eg oo falfalkoodii ku sameeyeen. 12 Waayo, nin waluba
wuxuu tuuray ushiisii, markaasay waxay noqdeen abeesooyin, laakiinse ushii Haaruun
baa wada liqday ulahoodii oo dhan. 13 Qalbigii Fircoonna
wuu sii qallafsanaaday, mana uu dhegaysan iyagii, sidii Rabbigu yidhi.
Belaayadii Dhiigga
14 Markaasaa Rabbigu wuxuu Muuse ku yidhi, Fircoon waa macangag,
oo wuu diidayaa inuu dadka sii daayo. 15 Bal subaxda Fircoon
u tag, waayo, aroorta wuxuu tagaa biyaha. Haddaba waxaad istaagtaa webiga qarkiisa
inaad la kulantid isaga; oo gacanta waxaad ku qaadataa ushii abeesada noqotay.
16 Oo waxaad isaga ku tidhaahdaa, Rabbiga ah Ilaaha Cibraaniyada
ayaa ii soo kaa diray, oo wuxuu kugu yidhi, Sii daa dadkaygu ha tageene, inay cidlada
iigu adeegaan; oo bal eeg, hadda ka hor ima aad maqlin. 17
Oo waxaa Rabbigu ku leeyahay, Tan ayaad ku ogaan doontaa inaan Rabbiga ahay, bal
ogow, ushan aan gacanta ku hayo ayaan ku dhufan doonaa biyaha webiga ku jira, markaasay
waxay u rogman doonaan dhiig. 18 Oo kalluunka biyaha ku jiraana
way wada bakhtiyi doonaan, markaasaa webigu soo uri doonaa; kolkaasaa Masriyiintu
aad u nebcaan doonaan inay webiga biyo ka cabbaan. 19 Rabbigu
wuxuu Muuse ku yidhi, Waxaad Haaruun ku tidhaahdaa, Ushaada qaado, oo gacanta ku
kor fidi biyaha Masar, iyo webiyaashooda, iyo durdurradooda, iyo galalkooda, iyo
balliyadooda biyaha ah oo dhan, si ay u noqdaan dhiig; oo dhulka Masar oo dhammu
wuxuu noqon doonaa dhiig miidhan, oo ku jiri doona weelasha qoriga ah iyo weelasha
dhagaxa ahba. 20 Markaasaa Muuse iyo Haaruun yeeleen sidii
Rabbigu ku amray; kolkaasuu ushii kor u qaaday, oo biyihii webiga ku jiray ku dhuftay
Fircoon iyo addoommadiisii hortooda, markaasaa biyihii webiga ku jiray oo dhammu
waxay u rogmadeen dhiig. 21 Kalluunkii webiga ku jirayna
way wada bakhtiyeen; webigiina waa uray, Masriyiintiina biyo way ka cabbi kari waayeen
webigii; dhulkii Masar oo dhammuna wuxuu noqday dhiig miidhan.
22 Markaasaa saaxiriintii Masarna waxay yeeleen sidii si le'eg oo
falfalkoodii ku sameeyeen. Qalbigii Fircoonna wuu sii qallafsanaaday, mana uu dhegaysan
iyagii, sidii Rabbigu yidhi. 23 Kolkaasaa Fircoon noqday
oo gurigiisii tegey, waxanna qalbigiisii maba uu gelin. 24
Markaasaa Masriyiintii oo dhammu waxay qoteen webiga dhinacyadiisa inay helaan biyo
ay cabbaan, waayo, biyihii webiga way cabbi kari waayeen.
25 Oo intii Rabbigu webiga kharribay toddoba maalmood baa ka dambaysay.
^ Dib u celi bilawga ^
8
Belaayadii Raha
1 Markaasaa Rabbigu wuxuu Muuse ku yidhi, Fircoon u tag,
oo waxaad ku tidhaahdaa, Waxaa Rabbigu leeyahay, Dadkayga sii daa ha tageene inay
ii adeegaan. 2 Oo haddii aad diiddo inaad sii daysid, bal
hadda ogow, waddankaaga oo dhan waxaan ku soo dayn doonaa rahyo.
3 Oo webiga waxaa ka buuxsami doona rahyo, markaasay waxay tegi
doonaan oo geli doonaan gurigaaga, iyo qawladdaada aad seexatid, iyo sariirtaada
dusheeda, iyo guryaha addoommadaada oo dhan, iyo dadkaaga dushiisa, iyo foornooyinkaaga
dhexdooda, iyo weelashaada wax lagu cajiimo oo dhan; 4 oo
rahyadu waxay kor fuuli doonaan adiga, iyo dadkaaga, iyo addoommadaada oo dhanba.
5 Markaasaa Rabbigu wuxuu Muuse ku yidhi, Waxaad Haaruun
ku tidhaahdaa, Gacanta adoo ushaada ku haysta ku fidi webiyaasha dushooda, iyo durdurrada
dushooda, iyo balliyada dushooda, oo rahyo ku soo daa dalka Masar.
6 Markaasaa Haaruun gacanta ku kor fidiyey biyihii dalka Masar oo
dhan, kolkaasaa rahyadii soo baxeen oo qariyeen dalkii Masar.
7 Saaxiriintiina sidaas si le'eg bay yeeleen oo falfalkoodii ku sameeyeen, oo rahyo
bay keeneen dalkii Masar. 8 Markaasaa Fircoon wuxuu u yeedhay
Muuse iyo Haaruun, oo wuxuu ku yidhi, Rabbiga noo barya inuu rahyada naga qaado
aniga iyo dadkaygaba; oo markaasaan dadka sii dayn doonaa inay tagaan oo ay Rabbiga
allabari u bixiyaan. 9 Kolkaasaa Muuse wuxuu Fircoon ku yidhi,
Adaa amarka leh; goormaan idiin baryaa adiga iyo addoommadaada iyo dadkaaga, iyo
in rahyada laga baabbi'iyo adiga iyo guryahaagaba, oo ay ku hadhaan webiga keliya?
10 Markaasuu ku yidhi, Berri. Isaguna wuxuu yidhi, Sidaad
u tidhi ha noqoto, bal inaad ogaatid inaanu jirin mid la mid ah Rabbiga ah Ilaahayaga.
11 Oo rahyadu waa ka tegi doonaan adiga iyo guryahaaga, iyo
addoommadaada, iyo dadkaagaba, oo waxay ku hadhi doonaan webiga oo keliya.
12 Kolkaasay Muuse iyo Haaruun ka tageen Fircoon; markaasaa Muuse
Rabbiga ugu qayshaday wax ku saabsan rahyadii uu ku soo daayay Fircoon.
13 Rabbiguna wuu yeelay siduu Muuse yidhi, oo rahyadii waa ka idlaadeen
guryihii, iyo barxadihii, iyo beerihiiba. 14 Kolkaasay isu
soo wada ururiyeen oo meelo ku tuuleen, markaasaa dalkii uray.
15 Fircoonse markuu arkay inay wixii joogsadeen ayuu qalbiga ka sii qallafsanaaday,
mana uu dhegaysan iyagii, sidii Rabbigu yidhi.
Belaayadii Injirta
16 Markaasaa Rabbigu wuxuu Muuse ku yidhi, Waxaad Haaruun
ku tidhaahdaa, Ushaada fidi oo ciidda dhulka ku dhufo si uu dalka Masar oo dhammu
injir miidhan u noqdo. 17 Markaasay sidii yeeleen. Kolkaasaa
Haaruun ushiisii gacanta ku fidiyey, oo wuxuu ku dhuftay ciidda dhulka, kolkaasaa
injiru gashay dadkii iyo duunyadiiba; ciiddii dhulka oo dhammuna waxay noqotay injir
miidhan oo qulqulaysa dalkii Masar oo dhan. 18 Saaxiriintiina
saasay yeeleen, oo waxay damceen inay injir falfalkoodii ku keenaan, laakiinse way
kari waayeen; injir baana ku jirtay dadkii iyo duunyadiiba.
19 Markaasaa saaxiriintii waxay Fircoon ku yidhaahdeen, Tanu waa fartii Ilaah. Qalbigii
Fircoonna wuu sii qallafsanaaday, mana uu dhegaysan iyagii, sidii Rabbigu yidhi.
Belaayadii Duqsiyada
20 Markaasaa Rabbigu wuxuu Muuse ku yidhi, Aroor hore kac
oo Fircoon hortiisa istaag, waayo, markaasuu biyaha tegayaa, oo waxaad ku tidhaahdaa,
Waxaa Rabbigu leeyahay, Dadkayga sii daa ha tageene inay ii adeegaan.
21 Haddii kalese haddaadan dadkayga sii daynin inay tagaan, bal
ogow, waxaan idiin soo diri doonaa duqsiyo faro badan, adiga, iyo addoommadaada,
iyo dadkaaga, iyo guryahaaga dhexdooda; oo guryaha Masriyiinta oo dhanna waxaa ka
buuxsami doona duqsiyo faro badan, iyo weliba dhulka ay joogaanba.
22 Inaad ogaatid inaan anigu dhulka dhexdiisa ku ahay Rabbiga, maalintaas waan ka
duwi doonaa dalka Goshen oo dadkaygu deggan yahay, inaan duqsiyo badanu halkaas
jirin innaba. 23 Oo dadkayga iyo dadkaagana waan kala sooci
doonaa; calaamadaasuna berri bay ahaan doontaa. 24 Rabbiguna
sidii buu yeelay, oo duqsiyo badan oo baas ayaa yimid gurigii Fircoon, iyo guryihii
addoommadiisa, oo dalkii Masar oo dhanna duqsiyadii badnaa aawadood ayuu u kharribmay.
25 Markaasaa Fircoon wuxuu u yeedhay Muuse iyo Haaruun, oo
wuxuu ku yidhi, Taga oo Ilaahiin dalka dhexdiisa allabari ugu bixiya.
26 Kolkaasaa Muuse ku yidhi, Sidaas inaan yeelno ma habboona; waayo,
karaahiyada Masriyiinta ayaannu Rabbiga Ilaahayaga ah u bixinaynaa. Bal eeg, miyaannu
karaahiyada Masriyiinta ku allabarinnaa iyagoo noo jeeda? De sow na dhagxin maayaan?
27 Meel saddex maalmood loo socdo oo cidla ah ayaannu tegaynaa,
oo allabari ugu bixinaynaa Rabbiga Ilaahayaga ah, siduu nagu amri doono.
28 Markaasaa Fircoon wuxuu ku yidhi, Waan idin sii daynayaa inaad
tagtaan inaad cidlada allabari ugu bixisaan Rabbiga Ilaahiinna ah, laakiinse waa
inaydnaan aad u fogaan. Iina soo duceeya. 29 Muusena wuxuu
ku yidhi, Bal eeg, waan kaa baxayaa oo waxaan Rabbiga ka baryi doonaa inay duqsiyada
badanu berri ka tagaan Fircoon iyo addoommadiisa, iyo dadkiisa, laakiinse Fircoon
yuusan mar dambe khiyaano nagula macaamiloon, isagoo aan daynin dadka inay tagaan
si ay allabari ugu bixiyaan Rabbiga. 30 Markaasaa Muuse ka
tegey Fircoon, oo wuxuu baryay Rabbiga. 31 Rabbiguna sidii
Muuse yidhi ayuu yeelay; duqsiyadii badnaana wuu ka kexeeyey Fircoon, iyo addoommadiisii,
iyo dadkiisiiba. Mid qudh ahna kama hadhin. 32 Markanna Fircoon
qalbiga ayuu ka sii qallafsanaaday, oo dadkiina siima uu dayn inay tagaan.
^ Dib u celi bilawga ^
9
Belaayadii Ku Dhacday Xoolaha
1 Markaasaa Rabbigu wuxuu Muuse ku yidhi, Fircoon u tag,
oo waxaad ku tidhaahdaa, Waxaa Rabbiga ah Ilaaha Cibraaniyadu leeyahay, Dadkayga
sii daa ha tageene, inay ii adeegaan. 2 Waayo, haddii aad
sii dayn weydo, oo aad sii haysatid, 3 bal ogow, gacanta
Rabbigu waxay ku dhici doontaa xoolahaaga berrinka jooga, ha ahaadeen fardaha, dameeraha,
geela, lo'da, iyo adhigaba; waxaana dhici doona cudur baas.
4 Oo Rabbigu waa kala sooci doonaa xoolaha reer binu Israa'iil iyo xoolaha Masar;
oo waxa reer binu Israa'iil ay leeyihiinna waxba kama dhiman doonaan.
5 Rabbiguna wakhti buu u qabtay, isagoo leh, Berri Rabbigu waxan
ayuu dalka dhexdiisa ku samayn doonaa. 6 Rabbiguna waxaas
waa sameeyey maalintii dambe, oo xoolihii Masar oo dhammuna way wada bakhtiyeen;
laakiinse xoolihii reer binu Israa'iil midna kama bakhtiyin.
7 Markaasaa Fircoon cid diray, oo bal eeg, xoolihii reer binu Israa'iil xataa mid
kama bakhtiyin. Laakiinse Fircoon wuu madax adkaaday, dadkiina siima uu dayn inay
tagaan.
Belaayadii Boogaha
8 Markaasaa Rabbigu wuxuu Muuse iyo Haaruun ku yidhi, Waxaad
qaadataan cantoobooyin dambaska foornada ah, oo Muuse samada ha u saydho Fircoon
hortiisa. 9 Oo waxay noqon doontaa habaas dhulka Masar oo
dhan dul yaal, oo dalka Masar oo dhan waxaa dadka iyo duunyadaba ka soo bixi doona
boogo xunxun. 10 Markaasay qaadeen dambaskii foornada, oo
waxay hor istaageen Fircoon; kolkaasaa Muuse xagga samada kor ugu saydhay, markaasaa
dadkii iyo duunyadiiba waxaa ka soo wada baxay boogo xunxun.
11 Oo saaxiriintiina Muuse ma ay hor istaagi karin boogaha dartood,
waayo, booguhu waxay ka soo bexeen saaxiriintii iyo Masriyiintii oo dhan.
12 Rabbiguna waa sii qallafiyey Fircoon qalbigiisii, oo isna ma
uu dhegaysan iyagii, sidii Rabbigu Muuse ku yidhi.
Belaayada Roobdhagaxyaale Baas Ah
13 Markaasaa Rabbigu wuxuu Muuse ku yidhi, Aroor hore kac,
oo Fircoon hortiisa istaag, oo waxaad ku tidhaahdaa, Rabbiga Ilaaha Cibraaniyada
ah wuxuu leeyahay, Dadkayga sii daa ha tageene, inay ii adeegaan.
14 Waayo, waxaan markan qalbigaaga, iyo addoommadaada, iyo dadkaagaba ku soo dayn
doonaa belaayadayda oo dhan, inaad ogaatid inaan dhulka oo dhan lagu arag mid anoo
kale ah. 15 Waayo, haatan haddaan gacantayda fidin lahaa,
oo aan belaayo kugu dhufan lahaa adiga iyo dadkaagaba, de markaas adiga dhulka waa
lagaa baabbi'in lahaa, 16 laakiin sababtan aawadeed ayaan
kuu taagay, inaan xooggayga kaa muujiyo iyo in magacayga laga sheego dhulka oo dhan.
17 Ma weli baad dadkayga iska weynaynaysaa, oo aanad sii
daynin? 18 Bal ogow, berrito haddaa oo kale waxaan soo daadin
doonaa roobdhagaxyaale baas oo aan weligiis lagu arag Masar tan iyo maalintii la
dhisay ilaa haatan. 19 Haddaba cid u dir oo la soo dhaqso
lo'daada iyo waxa berrinka kuu jooga oo dhan; waayo, dad iyo duunyo wixii berrinka
laga helo oo dhan oo aan guryaha la soo gelin, waxaa ku soo degi doona roobka dhagaxyada
leh, wayna dhiman doonaan. 20 Markaasaa mid kasta oo addoommadii
Fircoon ka mid ahaa oo ka cabsanayay ereygii Rabbiga, addoommadiisii iyo lo'diisii
ayuu xagga guryaha u eryay; 21 kii aan dan ka lahayn ereygii
Rabbigase addoommadiisii iyo lo'diisiiba ayuu berrinka ku daayay.
22 Markaasaa Rabbigu wuxuu Muuse ku yidhi, Gacanta xagga
samada u fidi, in roobka dhagaxyada leh ku soo dego dalka Masar oo dhan, dadka dushiisa
iyo duunyada dusheeda iyo dhalatada duurka ku taal dusheeda oo dhan ee dalka Masar
dhammaantiis. 23 Markaasaa Muuse ushiisii u fidiyey xagga
samada, oo Rabbigu wuxuu soo diray onkod iyo roobdhagaxyaale, waxaana dhulka ku
soo degay dab; oo Rabbigu wuxuu dalkii Masar ku soo daayay roobdhagaxyaale.
24 Sidaas daraaddeed waxaa ku soo da'ay roobdhagaxyaale baas, roobka
dhagaxyada lehna waxaa ku qaldanaa dab, kaas oo kalena weligiis kama di'in dalka
Masar oo dhan tan iyo maalintii ay quruun noqotay ilaa haatan.
25 Oo roobkii dhagaxyada lahaana wuxuu laayay wax alla wixii dalka Masar oo dhan
duurkiisa joogay, dad iyo duunyoba; oo dhalatadii duurka oo dhanna roobkii dhagaxyada
lahaa baa laayay, oo dhirtii duurka oo dhanna wuu jejebiyey.
26 Waxaa keliyahoo aan roobdhagaxyaale ku di'in dalkii Goshen oo reer binu Israa'iil
joogeen. 27 Markaasaa Fircoon cid u diray, oo u yeedhay Muuse
iyo Haaruun, oo wuxuu iyagii ku yidhi, Markan waan dembaabay; Rabbigu waa xaq, aniga
iyo dadkaygubana shar baannu leennahay. 28 Bal Rabbiga noo
barya, waayo, roobkan dhagaxyada leh iyo onkodkan weynu waa nagu filan yihiin; oo
waan idin sii dayn doonaa, oo idinku mar dambe sii joogi maysaan innaba.
29 Kolkaasaa Muuse wuxuu isagii ku yidhi, Isla markii aan ka baxo
magaalada ayaan gacmahayga u kala bixin doonaa Rabbiga, oo onkodku waa joogsan doonaa,
roobdhagaxyaale dambena ma jiri doono, si aad adigu u ogaatid inuu Rabbigu dhulka
leeyahay. 30 Laakiin waan ogahay in adiga iyo addoommadaadu
aydnaan weli ka cabsanayn Rabbiga Ilaaha ah. 31 Oo cudbigii
iyo shaciirkiiba waa baabbe'een; waayo, shaciirku waa midhaystay, cudbigana ubax
baa ka baxayay. 32 Laakiinse sarreenkii waxba kuma dhicin;
waayo, weli aad uma uu bixin. 33 Oo Muusena magaaladii buu
ka baxay, wuuna ka tegey Fircoon, oo gacmihiisii buu u kala bixiyey Rabbiga. Markaasaa
onkodkii iyo roobkii dhagaxyada lahaaba joogsadeen, roobkiina dhulka kuma shubmin.
34 Fircoonna kolkuu arkay inay joogsadeen roobkii iyo roobdhagaxyaalihii
iyo onkodkiiba, ayuu weliba sii dembaabay, oo qalbigiisiina wuu sii qallafiyey,
isaga iyo addoommadiisiiba. 35 Oo Fircoon qalbigiisiina waa
sii qallafsanaaday, oo reer binu Israa'iilna siima uu dayn inay tagaan, sidii Rabbigu
Muuse afkiisa kaga hadlay.
^ Dib u celi bilawga ^
10
Belaayadii Ayaxa
1 Kolkaasaa Rabbigu Muuse ku yidhi, Orod oo Fircoon u gal,
waayo, qalbigiisii waan qallafiyey, iyo qalbiyadii addoommadiisa, inaan calaamooyinkaygan
dhexdooda ka muujiyo, 2 iyo inaad adigu u sheegtid dhegaha
wiilkaaga, iyo wiilkaaga wiilkiisa, wixii aan ku sameeyey Masriyiinta, iyo calaamooyinkaygii
aan ku dhex sameeyey, inay iyagu ogaadaan inaan anigu ahay Rabbiga.
3 Markaasaa Muuse iyo Haaruun waxay u tageen Fircoon, oo ku yidhaahdeen,
Rabbiga ah Ilaaha Cibraaniyadu wuxuu kugu yidhi, Ilaa goormaad diidaysaa inaad hortayda
is-hoosaysiiso? Dadkayga sii daa ha tageene, inay ii adeegaan.
4 Laakiinse haddii aad diiddo inaad dadkayga sii dayso, bal ogow, berrito dalkaaga
ayax baan ku soo dayn doonaa, 5 oo dhulkuu qarin doonaa,
si aan dhulka loo arkin, oo wuxuu cuni doonaa wixii ka baxsaday roobkii dhagaxyada
lahaa oo idiin hadhay, oo wuxuu kaloo cuni doonaa geed kasta oo duurka idiinka baxaya.
6 Oo wuxuu ka buuxsami doonaa guryahaaga, iyo guryaha addoommadaada,
iyo guryaha Masriyiinta oo dhan; si aan aabbayaashiin iyo awowayaashiin midkoodna
arag tan iyo waagii ay dhulka joogeen ilaa maantadan. Kolkaasuu ka noqday oo ka
tegey Fircoon. 7 Markaasaa Fircoon addoommadiisii waxay ku
yidhaahdeen, Ilaa goormuu ninkanu dabin inagu noqonayaa? Inaga sii daa nimanka,
Rabbiga Ilaahooda ah ha u adeegeene. War miyaadan weli ogayn in Masar baabba'day?
8 Markaasaa Muuse iyo Haaruun mar kale loo keenay Fircoon.
Kolkaasuu wuxuu ku yidhi, Taga oo Rabbiga Ilaahiinna ah u adeega, laakiinse waa
ayo kuwa tegayaa? 9 Muusena wuxuu yidhi, Annagu waannu tegaynaa
yar iyo weynba, oo waxaannu la tegaynaa wiilashayada iyo gabdhahayaga, iyo adhyahayaga,
iyo lo'dayada oo dhan; waayo, waxaannu u iidaynaa Rabbigayaga.
10 Oo wuxuu iyagii ku yidhi, Rabbigu ha idinla jiro, haddaan idin
sii daayo idinka iyo yaryarkiinnaba, laakiinse bal ogaada in wax xumu idinka horreeyaan.
11 Sidaas ma aha; ee intiinna ragga ahu taga, oo Rabbiga
u adeega; waayo, taasu waa wixii aad doonayseen. Kolkaasaa Fircoon hortiisa laga
eryay iyagii.
12 Markaasaa Rabbigu wuxuu Muuse ku yidhi, Gacantaada ayaxa
ugu fidi dalka Masar korkiisa, inuu kor yimaado dalka Masar, oo uu cuno geed yar
oo kasta, oo ah in alla intii roobkii dhagaxyada lahaa ka baxsatay. 13 Markaasuu Muuse ushiisii dalkii Masar ku kor fidiyey, oo Rabbigu
maalintaas oo dhan iyo habeenkii oo dhan, wuxuu dhulkii ku soo daayay dabayl bari
ka timid, oo markii waagii beryay ayaa dabayshii bari ayaxii keentay.
14 Kolkaasaa ayaxii dalkii Masar oo idil dul fuulay, oo wuxuu ku
soo degay dalkii Masar oo dhan; wuxuuna ahaa ayax baas; hortiisna lama arag ayax
saas oo kale ah, dabadiisna ma jiri doono kaas oo kale. 15
Waayo, wuxuu qariyey dhulka dushiisa oo dhan, kolkaasaa dalkii gudcur noqday; oo
wuxuu cunay dhalatadii waddanka oo dhan, iyo midhihii dhirtii roobkii dhagaxyada
lahaa ka baxsaday oo dhan; oo dalkii Masar oo dhanna wax cagaar ahuna kuma hadhin
ama dhir ha noqoto ama dhalatada duurka. 16 Markaasaa Fircoon
dhaqso ugu yeedhay Muuse iyo Haaruun, oo wuxuu ku yidhi, Waan ku dembaabay Rabbiga
Ilaahiinna ah iyo idinkaba. 17 Haddaba waan ku baryayaaye,
iga cafi dembigayga markan keliya, oo ii barya Rabbiga Ilaahiinna ah, inuu iga qaado
dhimashadan keliya. 18 Kolkaasuu Fircoon dibadda uga baxay
oo Rabbiga baryay. 19 Markaasaa Rabbigu wuxuu soo leexiyey
dabayl aad iyo aad u xoog badan oo galbeed ka timid, kolkaasay ayaxii kor u qaadday
oo waxay ku gurtay Badda Cas, oo xataa ayax qudha ahi kuma hadhin dalka Masar oo
dhan. 20 Markaasaa Rabbigu sii qallafiyey Fircoon qalbigiisii,
mana uusan sii dayn reer binu Israa'iil inay tagaan.
Belaayadii Gudcurka
21 Markaasaa Rabbigu wuxuu Muuse ku yidhi, Gacantaada xagga
samada u taag, in gudcur ku soo dego dalka Masar, kaasoo ah gudcur aad u daran.
22 Kolkaasaa Muuse gacanta xagga samada u taagay; oo waxaa
dalkii Masar ku soo degay gudcur weyn oo in saddex maalmood ah jiray;
23 oo midkoodna midka kale ma arkin, ama midkoodna meeshiisii kama
kicin in saddex maalmood ah; laakiinse reer binu Israa'iil oo dhan guryahoodu iftiin
bay lahaayeen. 24 Markaasaa Fircoon Muuse u yeedhay oo wuxuu
ku yidhi, Taga oo Rabbiga u adeega; laakiinse adhyihiinna iyo lo'diinnu ha joogeen;
yaryarkiinnuse ha idin raaceen. 25 Muusena wuxuu yidhi, De
waa inaad weliba na siisaa allabaryo iyo qurbaan la gubo, oo aannu u bixinno Rabbiga
ah Ilaahayaga. 26 Lo'dayaduna waa inay na raacdaa, oo waa
inaan neef keliyahu dib nooga hadhin, waayo, iyada waa inaannu wax ka qaadannaa
si aannu ugu adeegno Rabbiga ah Ilaahayaga. Annagu garan mayno wax aannu ugu adeegno
Rabbiga jeeraannu tagno xaggaas. 27 Laakiinse Rabbigu waa
sii qallafiyey Fircoon qalbigiisii, mana u doonaynin inuu iyaga sii daayo.
28 Markaasaa Fircoon wuxuu isagii ku yidhi, War iga tag, oo iska
jir, si aadan wejigayga mar dambe u arkin, waayo, maalintii aad wejigayga aragtid
hubaal waad dhiman doontaa. 29 Markaasaa Muuse wuxuu ku yidhi,
Adigu si wanaagsan baad u hadashay, oo wejigaaga mar dambe arki maayo.
^ Dib u celi bilawga ^
11
Belaayadii Oo Ku Dhacday Curadyada
1 Markaasaa Rabbigu wuxuu Muuse ku yidhi, Weli belaayo kale
ayaan Fircoon iyo Masar ku soo dejin doonaa; oo dabadeedna wuu idin sii dayn doonaa
inaad halkan ka tagtaan, oo markuu idin sii daayo, giddigiin ayuu halkan idinka
sii wada eryi doonaa. 2 Haddaba dadka dhegihiisa maqashii,
oo nin waluba ha weyddiisto deriskiisa, naag walubana ha weyddiisato deriskeeda
alaab lacag ah iyo alaab dahab ah. 3 Rabbiguna Masriyiintii
ayuu dadkii raalli uga dhigay. Oo weliba ninkii Muuse ahaa wuxuu dalka Masar ku
ahaa mid aad u weyn xagga Fircoon addoommadiisa iyo xagga dadkaba.
4 Muusena wuxuu yidhi, Waxaa Rabbigu leeyahay, Habeenbadhka
baan dalka Masar ku dhex soconayaa, 5 oo curadyada dalka
Masar jooga oo dhammu way wada dhiman doonaan, curadka Fircoon oo ku fadhiya carshigiisa,
ilaa la gaadho curadka gabadha addoonta ah oo ka dambaysa dhagaxshiidka, iyo curadyada
xoolaha oo dhan. 6 Oo waxaa dalka Masar oo dhan jiri doonta
oohin weyn, taas oo kale aan hore loo arag, hadda kaddibna aan la arki doonin marnaba.
7 Laakiinse reer binu Israa'iil dad iyo duunyo toona xataa
eeyna afka u kala qaadi maayo, si aad u ogaataan in Rabbigu kala duway Masriyiinta
iyo reer binu Israa'iil. 8 Oo addoommadaadan oo dhammu anigay
ii iman doonaan, oo anigay ii sujuudi doonaan, iyagoo leh, Iska bax, adiga iyo dadka
kula socda oo dhammuba; oo markaas dabadeed ayaan bixi doonaa. Oo wuxuu Fircoon
kaga tegey cadho aad u kulul.
9 Markaasaa Rabbigu wuxuu Muuse ku yidhi, Fircoon hadalkaaga
dhegaysan maayo, inay cajaa'ibyadaydu dalka Masar ku sii bataan aawadeed.
10 Muuse iyo Haaruunna cajaa'ibyadan oo dhan waxay ku sameeyeen
Fircoon hortiisa; Rabbiguna waa sii qallafiyey qalbigii Fircoon oo isna ma uusan
sii dayn reer binu Israa'iil inay dalkiisa ka baxaan.
^ Dib u celi bilawga ^
12
Kormariddii Rabbiga
1 Oo Rabbigu wuxuu Muuse iyo Haaruun kula hadlay dalka Masar,
oo ku yidhi, 2 Bishanu waxay idiin noqonaysaa tii bilaha
ugu horraysay; oo waxay idiin noqonaysaa sannadda bisheedii kowaad.
3 Shirka reer binu Israa'iil oo dhan la hadla oo waxaad ku tidhaahdaan,
Maalinta tobnaad oo bishan waa in nin waluba wan qaataa sida reeraha aabbayaashood
yihiin, qoys waluba wan ha qaato; 4 oo haddii qoys uusan
wada qaadan karin wan, de markaas waa in isaga iyo deriskiisa oo ah kan qoyskiisa
ku xiga ay mid wada qaataan oo ay u qaybsadaan sida tirada dadku tahay; nin walba
sida cuntadiisu tahay waa inaad u tirisaan kalaqaybinta wanka.
5 Wankiinnu waa inuu ahaadaa mid aan iin lahayn, waana inuu ahaadaa mid lab oo sannad
jiray, waana inaad wananka ama orgiyada ka bixisaan, 6 oo
waa inaad gooni u xidhaan ilaa bisha maalinteeda afar iyo tobnaad; oo ururka shirka
reer binu Israa'iil oo dhammu waa inay makhribkii qalaan.
7 Oo waa inay dhiigga wax ka qaataan, oo ay mariyaan fayaaradda
albaabka labadeeda dhinac iyo meesheeda sare oo ah guryaha ay wax ku dhex cuni doonaan.
8 Oo habeenkaas waa inay cunaan hilibka oo dab lagu dubay,
iyo kibis aan khamiir lahayn, oo ha ku cuneen caleemo qadhaadh.
9 Ha cunina isagoo ceedhiin ama biyo lagu kariyey, laakiin waxaad cuntaan isagoo
dab lagu dubay, oo qaba madaxiisa iyo mijihiisa iyo waxa gudihiisa ku jira qaba.
10 Oo waa inaydnaan waxba ka reebin ilaa subaxda, laakiin
waxa ka hadha markuu waagu beryo waa inaad dab ku gubtaan.
11 Oo sidan waa inaad u cuntaan, idinkoo guntan, oo kabihiinnu cagaha idiinku jiraan,
ushiin | | |